Logoa arku formako harrizko zubi batek osatzen du, eta, aldi berean, ortzadarra ere irudikatzen du. Zubia osatzen duen harri bakoitza, ortzadarraren ordena kromatikoari jarraituz koloreztatuta dago eta horrek diseinuari kolore eta bizitasun elementu bat gehitzen dio.
Logotipoa
Herri Urrats logotipoa irudikapen bisual berezi eta esanguratsua da, ortzadarraren eta zubiaren kontzeptuak uztartzen dituena, beti ere mezu indartsu eta sinboliko bat helarazteko asmoz. Zubiaren erabilerak euskal herriaren baitan hainbat pertsona, kultura eta komunitateen batasuna irudikatu nahi du.
Ortzadarraren kolore bakoitzak ekimenean elkarrekin lan egiteko elkartzen diren esperientzia, identitate eta ikuspuntu aniztasuna sinbolizatzen duen bitartean. Euskal kulturaren eta ekimenaren beraren aberastasuna eta bizitasuna azpimarratzen ditu.
“Ortzadarra” leloak logoaren irudia osatzen du, ortzadarraren kontzeptuarekin eta aniztasun, batasun eta itxaropen konnotazioekin duen lotura indartuz. Prozesu natural honek etengabeko mugimendua eta eraldaketa iradokitzen du, aurrera egiteko ideiarekin lotu daitekeena, ezinbestekoa dena Herri Urrats bezalako ekimen batean. Guztira, Herri Urrats logoak ekimenaren misioa eta balioak eraginkortasunez helarazten ditu zubiaren eta ortzadarraren sinbolismoa batuz, euskararen eta euskararen aniztasuna eta batasuna azpimarratuz.
Leloa: Ortzadarra
Herri Urratsi itsatsirik daude eguzkia eta euria. Bietako bat protagonista izan ohi da urtero. Batzuetan biak batera ere etorri izan dira, eta haiekin ortzadarra. Usu negar egin behar izan dugun arren, baikorrak gara, eta ortzadarrak islatzen du baikortasun hori. Ortzadarra irteten denean, ematen du indar bat, ematen du zoriontasun bat, sortzen du irribarre bat. Hori da, aurtengo leloarekin eman nahi dugun mezuetako bat.
Ortzadarra, ostadarra, uztadarra, ostabarra, ostarkua… gauza berari deitzeko hamaika izen, eta horiekin baita Erromako zubia ere. Hori ere irudikatzen baitu ortzadarrak: zubi bat da. Ikastolak, berriz, zubigileak gara, bokazio hori daukagu. Gure arteko harremanak eraiki ditugunean, gertukoenen artean bezala, lurralde desberdinen artean, zubiak eraiki ditugu euskara izanik lehengai. Eta zubiak eraiki ditugu, gu bezala, hizkuntza gutxituetan mintzo diren herriekin ere. Zubiek batu egiten dute eta guk batasun hori ere islatu nahi dugu aurtengo leloarekin. Ortzadarrak aniztasuna ere esan nahi du. Aniztasuna irudikatzen dute bere koloreek. Eta ikastolok kolore guztiak nahi ditugu. Aniztasuna koloreetan baina batasuna ere bai, denak bat eginda ageri direlako zubi ere baden egitura horretan. Aniztasuna eta batasuna, beraz, gure hizkuntza den bezala.
